Godthaab í Nöf ehf.
Hluthafar.
Björn Þorgrímsson Drífa Kristjánsdóttir
Daði Pálsson Þóra Hrönn Sigurjónsdóttir
Einar Bjarnason Ester Ólafsdóttir
Jón Ólafur Svansson Hafdís Magnúsdóttir
Sigurjón Óskarsson Sigurlaug Alfreðsdóttir
Einkahlutafélagið Godthaab í Nöf var stofnað þann 15.október 2001.
Var þá hafin vinna við að gera upp húsnæði félagsins að Garðavegi 14 þar sem áður hafði verið starfrækt saltfisk og skreiðarverkun og undir það síðasta var húsið notað sem saltgeymsla.
Mikið verk var fyrir höndum þar sem húsnæðið þurfti mikilla endurbóta við og næstu mánuðina var unnið öflugt starf við að gera húsið þannig úr garði að það væri nothæft fyrir matvælaframleiðslu.
Þann 2 febrúar 2002 hófst svo vinnsla í Nöfinni.
Starfsmenn í fyrstu voru 20. Helsti tækjabúnaður var uppgerð flökunarvél af gerðinni Baader 189 ,12 stæða flæðilína sem keypt var notuð,tveir frystiskápar svokallaðir Kínaskápar og tveir frystigámar þar sem fullunnar afurðir voru geymdar.
Næstu árin jukust umsvifin jafnt og þétt,starfsmönnum fjölgaði og keypt var húsnæði á efri hæð í Nöfinni sem IBV átti og hafði verið notað sem geymsluhúsnæði.
Byggður var frystiklefi,og smám saman fjölgaði vélum og tækjum í takt við aukin umsvif.
Í dag starfa að jafnaði 70 manns í Godthaab og unnið er úr 4000 tonnum af hráefni á ári.
Vinnsla og helstu markaðir.
Hráefni kaupir félagið bæði í beinum viðskiptum við útgerðir og á fiskmörkuðum.
Helstu vinnsluaðfeðir eru:
Fersk flök sem flutt eru erlendis sjóleiðis og með flugi í kældum umbúðum á markað í Evrópu.
Frystar afurðir flök og flakahlutar á markað í Evrópu og USA.
Saltaðar afurðir á Spánarmarkað.
Sérvinnsla fyrir innanlandsmarkað,frosinn fiskur,harðfiskur,saltfiskur, og reyktur fiskur.
Heimsendingarþjónusta og sala á netinu er nýjung sem verið er að koma á laggirnar og standa vonir til að Eyjamenn kunni að meta það framtak og nýta sér þjónustuna.
Bein og hausar fara til vinnslu hér í Eyjum hjá Ystakletti ehf.
Nafnið.
Þegar kom að því að velja nafn á fyrirtækið komu upp ýmsar hugmyndir og þar á meðal nafnið Godthaab en á bakvið það var nokkuð sérstök saga.
Sex okkar stofnenda félagsins voru starfsmenn Ísfélags Vestmannaeyja þegar frystihús þess varð eldi að bráð í desember árið 2000.
Í kaffistofu Ísfélagsins var gamalt tréskilti til skrauts en skilti þetta var af gamla Godthaabhúsinu sem var í eigu Einars heitins Sigurðssonar ríka.
Áletrunin á skiltinu var Godthaab 1830.
Þegar hamförunum lauk og tekist hafði að hefta eldinn og farið var að huga að skemmdum kom í ljós að nánast allt var brunnið sem brunnið gat,vinnslusalir voru rústir einar,flökunarvélar og frystiskápar voru nánast járnhaugar,eldurinn hafði engu eirt ekki fremur í kaffistofunni en annarsstaðar.
En eitt var það þó sem uppi stóð nánast óskemmt eins og haldið hefði verið yfir því verndarhendi í öllum hremmingunum nefnilega gamla skiltið af Godthaabhúsinu.
Þótti öllum þetta með mestu ólíkindum og voru settar fram ýmsar kenningar og tilgátur um ástæður þess að skiltið stóð uppi óskemmt meðan allt nálægt brann til kaldra kola.
Út frá þessu kom síðan hugmyndin með nafnið á fyrirtækið og ekki skemmdi fyrir merking orðsins þe.Godthaab-Góðvon.
Þar sem að húsnæði félagsins á Garðavegi heitir Nöf,varð nafnið Godthaab í Nöf.